Lalaki nabalian og tiil human nabanggaan sa motorsiklo

Luwas ra ang kahimtang sa usa ka lalaki apan bali ang wala nga tiil niini human nga mabanggaan sa usa ka motorsiklo pasado alas nuwebe kagabie didto sa Sayre Highway, Km-4, Barangay Casisang, Malaybalay City, Bukidnon.

Giila ang biktima nga si Noel Ulhila, 55 anyos, nga taga Barangay Tigbasan, Cabadbaran, Agusan Del Sur samtang gimaneho ang usa ka Yamaha Aerox nga motorsiklo, ni Ruby Jay Amor, 25 anyos, ulitawo, ug residente sa Purok-2, Barangay Bantuanon, Lantapan, Bukidnon.

Sumala sa taho sa kapulisan, nga patabok sa pikas nga bahin sa maong dalan ang biktima apan wala kini nabantayan sa gadagan nga motorsiklo tungod sa kangit-ngit sa maong lugar hinungdan sa pagkabanggaan niini.

Bali ang wala nga tiil sa biktima nga daling gidala sa Bukidnon Provincial Medical Center (BPMC) alang sa medical nga atensiyon. Samtang mipanawagan karon ang kapulisan sa mga kabanay sa biktima sa Barangay Tigbasan, Cabadbaran, Agusan Del Sur sa pagbisita kaniya sa balay-tambalanan kung asa kini kasamtangang gapaayo.