NAGDIWAL ang dila samtang naghikot og pisi sa liog ang lalaki nga nakit-ang wala nay kinabuhi atol sa kasaulogan sa Valentine’s Day sa Barangay Mantangale, Balingoan, Misamis Oriental.
Giila ang biktima nga si John Anthony Mabilanga, adunay kaipon, residente sa susamang dapit.
Sa inisyal nga imbestigasyon sa kapulisan sa Balingoan Police Station, gituohang nag-unang hinungdan mao ang problema sa gugma.
Nakita sa sent items sa cellphone sa biktima nga adunay mensahe “kung bulagan ko nimo maghikog ko” ngadto sa iyang kapuyo nga molargahay balik sa nasod sa Japan.
Aduna usab nakasulti nga sa wala pa nilakaw iyang kapuyo labihan ang away nga nahitabo niadtong bisperas sa Valentines.
Saysay sa inahan niining si Rosario ngadto sa kapulisan nga niadtong Miyerkules nga gipukaw niya iyang anak tungod kay alas 10:30 na sa buntag apan wala kini mitubag sa iyang lawak.
Hinungdan napugos ang inahan nga gubaon ang doorknob niini. Maoy iyang nadiskubre nga nagbitay na kini naghikot sa pisi sa iyang liog diin ang tumoy gihikot dapit sa alkuba.
Gituohang miambak kini sa katre usa nagbitay-bitay.
Gisuwayan pa kini og daal sa Municipal health center sa dapit apan gideklarar na kining patay sa doktor. Gani ang iyang mga silingan dili makatuo nga maghikog kini tungod kay malipayon man kanunay kini gawas lamang nga hilumon ug seryoso kaayo. Sa pagkakaron, ang patay’ng lawas anaa na sa puloy-anan sa biktima.
