South Cotabato– Patay ang 31 anyos nga ulitawo human nalumos sa Beb’s Swimming Pool resort sa Barangay Sta. Cruz, pasado alas 12:45 sa hapon niadtong nilabayng adlaw.
Giila ang biktima nga si Elmo Juntado Anas, lumulupyo sa Lapu-lapu Street, Barangay Zone 3, Koronadal City.
Nigawas sa imbestigasyon sa Koronadal Police Station, alas 9:00 sa buntag nagsulod sa nahisgutang swimming resort ang maong biktima kauban iyang 2 ka higala aron maligo. Apan ayha naligo, nag-inum una ang mga nahisgutan.
Lango na sa ilimnong makahubog ang biktima ayha kini niambak sa pool nga dunay gilawmon nga 6 feet. Uwahi nang nakit-an sa iyang duha ka mga kaubanan ang biktima nga naglutaw na sa tubig.
Gidali pa kini ug dala sa Ospital sa Koronadal apan gideklara na kining dead on arrival.
Ginpaidalom na post mortem examination ang patayng lawas sa biktima og padayon pa gihapon ang imbestigasyon sa maong insidente aron masuta kung duna bay Foul play sa pagkalumos niini. (Zaira Mae P. Arboladura, GSA Intern)
