Nagsaulog sang bag-ong tuig sa prisuhan ang suspek nga nagluthang sa lalaki nga hubog sa barangay Kasing-kasing, Molo alas 12:33 kaina sang udto.
Nagapabilin sa prisuhan sang Molo Police Station ang suspek nga si Noel Robles alyas Utay, 51 anyos sang Carles, Iloilo apang temporaryo nga nagapuyo sa nasambit nga barangay.
Ginpahayag nga ginluthang ni Robles ang biktima nga ginkilala kay Emmanuel Enriquez, 51 anyos sang amo man nga lugar.
Sa imbestigasyon sang Molo PNP, ginpahayag ni Police Major Engelbert Banquillo nga hubog ang biktima kag nagabitbit sang kutsilyo sang ginhatuk-hatuk sini sang buno ang screen door sang balay sang suspek.
bangud sini, nagbaisay ang duha kag naluthangan ni Robles ang nasambit nga biktima nga naigo sa natuo nga dughan kag naglapus sa likod ang bala.
Gilayon naman nga gindala sa Iloilo Doctor’s Hospital ang biktima kag padayon nga ginabulong.
Ginpanginwala naman sang suspek nga siya ang nagluthang kay Enriquez kag ginpanindugan nga madamo ini sang kontra sa ila lugar.
