Patay ang usa ka lalaki human misukol sa kapulisan sa Misamis Oriental atol sa pagsilbi sa search warrant mga alas 8:30 sa gabie sa Initao, Misamis Oriental.
Ang suspect nailang si Timoteo Savelliano, 50 anyos ug taga Purok 14, Barangay Poblacion, Initao, Misamis Oriental.
Matud ni Police Sr. Insp. Arlyne Ranario, Hepe sa Initao Municipal Police Station nga isilbi unta sa mga otoridad ang search warrant may kalabutan sa kasong paglapas sa Republic Act 9165 o Comprehensive Dangerous Drugs Act of 2002.
Gibutyag ni Ranario nga kalit nga midagan ang suspect sa taas sa ilang balay ug mikuha sa iyang armas ug gipusil ang kapulisan.
Mibalos og pusil ang mga otoridad busa naigo ug namatay ang suspect nga gisulayan pa og dala sa ospital apan gideklarang patay na.
Nakuha gikan kang Savelliano ang .38 nga armas, usa ka bala, unom ka sachet sa gituohang shabu ug cellular phone.
