ESCALANTE CITY, NEGROS OCCIDENTAL – Patay ang isa ka lalaki matapos nga gintiro sang wala makilala nga suspek kahapon sang hapon sa Brgy. Mabini, Escalante City.
Nakilala ang biktima nga si Raul Mayagma, 43 anyos ang edad, single kag pumuluyo sang Sitio Goc-ong, Brgy. Mabini sang amo nga ciudad, samtang, wala naman makilala ang suspek nga nagtiro sa iya.
Base sa inisyal nga imbestigasyon sang Escalante City Police Station, may mga las 3:30 kahapon sang hapon gintiro sang suspek ang biktima sa iya mismo lugar.
Nag-angkon sang madamo nga pilas si Mayagma sa pila ka bahin sang iya lawas nga amo naman ang gintunaan sang iya kamatayon.
Ginpahayag nga gilayon nga nagpalagyo ang suspek matapos niya nga nahimo ang krimen.
Na-recover sa scene of the crime ang 12 ka napalupok nga basiyo sang kalibre .45 nga armas./dyHB BACOLOD
