Gi-ambush kagahapon sa alas otso sa buntag ang law enforcement team sa Land Transportation Office kon LTO sa Surigao City.
Matud ni Radyoman Archer Capadeso sa RMN Butuan- nga patay sa insidente ang team leader sa LTO nga si Feixberto Loayon.
Samtang samaran ang mga miyembro sa team nga sila si Rene Sinanguta, 45 anyos, ug Fredie Wabina, 48 anyos, minyo.
Swerte usab nga wala maigo ang Assistant team leader nga si Estrebo Vilarmino.
Nasayran nga gikan nagpahigayon og checkpoint ang LTO alang sa anti kolorum nga kampanya, apan sa pagpauli sa grupo dinhi na sila gipangrakrakan sa mga armadong grupo sa area.
Nasayran usab nga naangkon ni Loayon ang samad sa ulo nga maoy hinungdan sa iyang kamatayon, igo pinusilan sa bukton si Sinangute ug igo sa likod si Wabina.
Samtang wala pay nakuha nga lead sa insidente ang Surigao City PNP.
Apan dako ang pagduda sa kapolisan, nga posibleng binuhatan kini sa New Peoples Army kon NPA, o kaha adunay kalambigitan sa ilang trabaho, ilabi na nga daghang mga kolorum operators ang nadakpan sa LTO.
Matud ni Atty. Sim Villareal- ang Spokesman sa LTO Caraga, nga layo sa iyang pagtuo nga binuhatan sa NPA ang maong insidente, tungod kay walay nahitabong pag-angkon sa panig niini o pagpagawas og press statement.
