Patay ang usa ka taas nga lider sa New Peoples Army o NPA human ilang na-engkwentro ang mga miltar nga sakop sa 65th Infantry Stalwart Battalion sa bukirang bahin sa Sitio Narvasa, Barangay Pinilayan, Tagoloan II, Lanao del Sur.
Kini ang gipahibalo ni Lt. Tere Ingente, ang spokesperson sa 4th ID Philippine Army kinsa mipaila sa maong rebelde nga si NPA leader alias Allan ang commanding officer sa Platoon 2 sa Guerilla Front Committee 68.
Matud ni Ingente, nga mihimo ang mga sundalo sa 65th IB sa ilang military operation dihang gipangpusil sila sa dili mominos 70 ka mga sakop sa NPA nga milungtad sa kapin kon kulang 20 minutos.
Human sa engkwentro misibog ang mga rebelde ug ilang gibiyaan ang ilang kaubang namatay sa engkwentro.
Gipahayag ni Ingente nga walay samaran o namatay gikan sa tropa sa goberno atol sa engkwentro.
Nakuha usab sa mga militar sa encounter site ang usa ka M16 rifle, usa ka AK-47 rifle, unom ka magazine sa AK-47 nga adunay mga buhing bala, 14 ka backpacks, 27 ka sakong bugas humay, medical supplies ug mga subersibong documents.
Gibutyag usab ni Brigadier General Eric Vinoya, Commander sa 403rd Infantry Brigade nga iyang gikasubo ang pagkamatay sa maong lider sa NPA.
