Lezo, Aklan – Kapin sa 7 ka mga classroom, principal’s office ag computer room rong totally burned ag 3 rong partially burned sa natabong sunog kabii sa Lezo Integrated School nga nahamtang sa Poblacion, Lezo, Aklan.
Suno kay FO1 Enrico Nam-ay it Bureau of Fire Numancia nga mga alas 8:45 kabii nakabaton sanda it tawag halin sa Lezo PNP nga nagakasunog rong nasambit nga eskwelahan.
Insigida sanda nga nag responde sa area ag pag-abot sa area hay nakita nanda nga mabahoe eon rong kaeayo rason nga nagpangayo sanda it back up sa Kalibo Fire.
Nag-abot man sa area rong Provincial Fire Marshal nga si FSupt. Nazrudyn M. Cablayan ag nakita na man nga masyado eong mabahoe rong kaeayo rason nga insigida ginpasaka sa 2nd alam rong sunog rason nga nag responde rong mga fire truck it Tangalan, Balete ag Ibajay.
Sa lugar man rong Lezo MDRRMO, PDRRMO Aklan ag Lezo PNP.
Dugang pa ni FO1 Nam-ay nga madasig nag eapta rong kaeayo bangud nga mabaskog rong hangin ag himo sa light materials ro ibang building ag may kalumaan eon.
Nasayuran nga sa classroom ni Mrs. Josie Rapiz nag umpisa rong kaeayo ag ginapatihan nga rong depektibo nga ceiling fan ro ginhalinan it kaeayo bangud nga suno sa sugid ni Mrs. Rapiz sa mga taga BFP hay kon amat naga andar ag kon amat hay uwa naga andar pero naga ugong raya.
Mag eowas kara may mga ginatutukan pang ibang anggulo ro mga taga BFP.
Kaeakip sa mga nasunog hay ro mga kagamitan sa room kamana kung computer, laptop, TV, projector, DVD ag iba pa.
Sa inisyal nga assessment it BFP Numancia nga nag abot sa sa P 6, 480,000.00 rong danyos pero posible nga magataas pa raya.
Sa makaron hay padayon pa rong imbestigasyon it BFP sa nasambit nga insidente.
