General Santos City—sikop sa operatiba sa Philippine Drug Enforcement Agency (PDEA) Regional Office-12, Special Enforcement Team Alpha (SET Alpha), Team Bravo (SET Bravo) ug Maasim Municipal Police Station ang gikaingong lider sa Premo Drug Group nga naglihukan sa Sarangani Province atol sa gihimong Buy-bust Operation sa Purok Benito, Barangay Kanalo, Maasim, Sarangani Province.
Suspek nailhang si Bebot Mato y Benito alias Bot Mato, 36, Tricycle driver, gitudlong lider sa Premo Drug Group ug residenti sa Prk. Benito, Barangay Kanalo, Maasim.
Sikop usab ang uyuan niini nga miyembro usab sa samang grupo nga si Saga Mato y Abbas, karpentiro, residenti sa samang lugar.
Alas 6:00 ang takna sa kabuntagon, Huwebes, July 27, 2017 dihang gihimo ang buybust operation sa maong lugar nga miresulta sa pagkasikop sa mga suspetsado.
Narekober gikan sa mga posisyon sa mga suspek ang 20 ka gramos nga gituohang shabu nga gibana-banaang may market Value nga P100,000.00 ug marked money kantidad ug P500.00 ug mga drug paraphernalia’s .
Sumala ni PDEA-12 Regional Director Gil Cesario Castro nga si Bebot Mato ang dugay nang gipanid-an sa ilang tropa ug uban pang unit sa kapulisan human migawas ang ilang pangalan nga involved sa drug group sa Sarangani ug Gensan. Migula gilayon ang grupong Premo Drug group kansa mga miyembro niini lambigit usab sa nagkandaiyang krimen.
Hugtanon usab nga gihimakak ni Bebot Mato nga siya lider sa Premo Drug Group. Sumala niini nga iyang giangkon nga siya nagbaligyaan ug druga kaniadto apan human milingkod sa katungdanan si Pangulong Rodrigo Duterte, iya nang giundangan ang iligal nga gimbuhaton.
Samtang ang uyuan niining si Saga Mato gihingusgan nga siya natingala nganong giapil siya ug sikop sa otoridad. Wala matud pa syay labot sa gikalambigitan sa iyang pag-umangkon.
Sa kasamtangan ang mga nahisgutan nagpabiling balhog sa silda sa PDEA-12 ug ginaandam na karon ang kasong paglapas sa Sec. 5, 11 ug 12 ilawom sa Art. II, ilawom sa RA 9165 (Comprehensive Dangerous Drug Act of 2002) batok sa mga suspek.
