Nagmugna og Task Force batok Dengue ang local government ning siyudad alayon sa pagsaka sa ihap sa mga nataptan sa maong sakit.
Ang maong Task Force giunhan sa City Health inabagan sa Department of Interior and Local Government o DILG, City Local Environment and Natural Resources o CLENRO, City Information Office, Office of the Committee Affairs, Presidente sa Liga ng mga Barangay ug City Risk Reduction Management Office.
Matud ni City Health Officer Dra. Fe Bongcas, dili lang dengue ang hatagan og pagtagad sa maong Task Force apan lakip na ang paghimo og plano kung dunay mahitabong kalamidad dinhi sa siyudad.
Nanghinaot ang doktora nga himoon sa mga miyembro sa task force ang ilang tahas ug responsibilidad sa pagbatok sa dengue.
Samtang, gibutyag ni Dr. Ramon Neri nga importante kini ilabina nga basi sa ilang gihimong monitoring, laumang mas motaas pa ang kaso sa maong sakit sugod ning bulana hangtud sa sunod bulan.
Sa karon, padayung gipahimangnoan sa mga personahe sa DOH ang publiko nga himoon ang pagpanglimpyo o 4 o’clock habit lakip na ang pagsoot og longsleeves, pajama ug paggamit sa moskitero ug insect repellent lotion.
