Kalibo, Aklan — Natigayon nga maaresto ko myembro it Batan MPS ag New Washington MPS rong sangka lolo nga nga may kasong rape kahapon sa Brgy. Mabilo, New Washington, Aklan.
Suno kay SPO1 Jose Patron it Batan MPS nga rong akusado nakilaea kay Teofelo Andrade y De Pedro alyas “Ati”, 75-anyos, native it Palay, Batan ag presente nga naga istar sa Sitio Tabay Brgy. Mabilo sa nasambit nga banwa.
Gin issue it korte rong warrant of arrest ko nagtaliwan pa nga Pebrero 13, 2013 ag uwa it pyansa nga gintaeana rong korte para sa anang temporaryong kahilwayan.
Suno pa gid kay SPO1 Patrol nga makapilang beses eon nanda gin hana nga dakpon rong suspek ugaling madanlog gid sa mga kapulisan.
Sa makaron hay nagapabilin pa nga at-large ro daywa ka mga kaibahan it akusado.
Temporaryo ra imaw nga naka detained sa lock up cell it Batan MPS ag igaturn over sa korteng natungdan.
Samtang sa pihak nga parte, emosyonal mat-a nga nagpaabot it pagpasaeamat rong nanay it biktima sa mga kapulisan ag iba pang mga tawo nga nagbulig kanda bangud uwa man hapabay-an ro andang kaso ag nahataw-an it hustisya ro anang unga.
