Davao City – Nagtoo si Bishop Dr. Ariel Coleto nga dili lang mga Dabawenyo ang nawad-an og pagtoo sa Dios apan ang uban sab nga kaliwatan sa tibuok Pilipinas.
Gibutyag ni Coleto nga daghan sa mga Pilipino karon hinayhinay nang nagpalayo sa Dios nga dakung epekto sa pagkawala sa ilang pagtoo nunot sa daghang problema ug kalibutanon nga kalipay.
Suma sa obispo, katumanan sa propesiya sa bibliya ang pagdaghan sa mga tawo nga mibiya ug misalikway sa presensiya sa Dios.
Lauman nga mas mugrabe pa ang pagkadautan sa tawo pag-abot sa panahon diin daghan unya kanila mahigugma sa buhat sa kalibutan kay sa paghangop sa Dios.
Ug kini nga kondisyon dili lang nahitabo sa Pilipinas apan bisan pa sa tanang kanasuran sa tibuok kalibu-tan samtang nagkaduol na ang ikaduhang pagbalik ni Hesu-Kristo.
Gi-usa-usa pagsaysay sa Balaang Kasulatan ang mga rason ngano mubulag ang tawo sa pagpangalagad sa Dios diin usa na niana mao ang paghigugma sa paghimo og sala atubangan sa Ginoo.
Gipasabot ni Coleto nga gigamhan sa gahum sa dautan ang mga tawo karon maong sayon ra kanila ang paghimo og sala nga dakung factor sa paghanaw sa ilang pagtoo sa Dios.
Timaan matud pa kini nga hapit na gayud ang ikaduhang pagbalik ni Hesu Kristo kay natuman na man ang mga panagna sa bibliya.
Kung na-usab man ang pagtoo sa mga tawo sa Dios kana walay laing mabasol kundi ang mga lideres sa simbahan kinsa kwestiyonable ang moralidad ug espiritwal nga kinabuhi.
Daghan sa mga lider sa simbahan karon nga salawayon og kinabuhi sama sa kaparian nga nagtuklod sa mga tawo nga masuko sa gobyerno inay nga mahimo untang tulay sa panaghiusa ug paghigugmaay.
Dugang ni Coleto nga ang pagsabwag sa pulong sa Dios ang gikinahanglan samtang dili pa muabot ang paghukom sa Ginoo.
RadyoMaN Joel Viray
