Bag-o na ang Regional Director sa Land Transportation Office o LTO sa Northern Mindanao human miretiro sa iyang pwesto si kanhi LTO Regional Director Oscar Salcedo.
Si Rhodelio Poliquit, nga Assistant director sa LTO mao na karon ang milingkod isip Acting Regional Director sa LTO, puli ni Salcedo nga miretiro sa iyang pwesto niadtong August 22 sa edad nga 65 anyos.
Si Salcedo nahimong Director sa LTO Region 10 sulod sa usa ka tuig, napulo ka bulan ug 12 ka adlaw.
Mahinumduman nga si Salcedo, gi-appoint ni Presidente Duterte sa pagka Regional Director sa LTO sa Region 10 niadtong Oktubre 10, 2017.
Sa iyang pagretiro sa serbisyo, gipadayag ni Salcedo ang iyang 23 ka mga accomplishments sulod sa kapin sa usa ka tuig sa iyang pagka regional director.
Pipila sa iyang mga accomplishments naglakip sa paghimog deputization sa LTO sa tanang syudad ug lungsod sa Region 10, 13 ka mga outreach program sa Bukidnon, Misamis Oriental ug Misamis Occidental, Camiguin, ug Lanao del Norte, pag-employ sa regular 65 ka mga regular employee sa LTO gikan sa 113 ka mga Job Orders.
Lakip sa gipadayag ni Salcedo ang iyang pakig-coordinate ni Senator Aquilino Koko Pimentel sa pagpangayog Patrol Car sa tanang LTO Provincial offices sa Region 10 ug pag-initiate sa Hapsay Highway sa Cagayan de Oro uban sa mga opisyal sa Roads and Traffic Administration.
