General Santos City–Swerte pang nakalingkawas sa kamatayon ang mag-amahang Ronelo Nunez og Gerald Nunez mga residente sa Purok Veterans Brgy Calumpang human silang gipamusil sa gituohang mga karnaper sa dalan nga bahin sa Purok Veterans Brgy Calumpang dakbayan sa Gensan.
Sa pakighinabi sa biktimang si Gerald, sakay sila sa motorsiklo uban iyang amahan paingon sa fishport dihang giharang sila sa duha ka mga armado og buot kuhaon ang ilang motor.
Tungod mipalag ang iyang amahan gipusil kini sa usa sa mga suspek igo sa iyang tiil, samtang gilayong miambak sa motor si Gerald aron makasibat apan gipusil siya sa usa pa ka suspek.
Luyo paman sa mga naangkong samad sa mag-amahan nakahimo sila sa pagpalayo gikan sa mga suspetsado kung asa mideretso ang iyang amahan sa Police Station sa Tambler samtang nakadagan usab si Gerald paingon sa balay sa iyang uyuan duol sa maong lugar.
Wala na hinuon migukod pa ang mga suspek inay paspas nga misibat gikan sa maong lugar apan wala nila madala ang motorsiklo sa mga biktima.
Aminado si Gerald nga dili niya mahulagway ang itsura sa mga suspetsado apan siya nagtoo nga iya kining matiman-an higayon nga iyang makit-an. (Jordan Britos)
