SIPALAY CITY – Pilason ang duha ka pulis matapos nga ginpangtiro ini sang suspek nga buot kon tani nila serbihan sang warrant of arrest las 12:25 kaina sang udto sa Sitio Indingawan, Barangay Manlocahoc.
Nakilala ang mga pulis nga amu sanday PO2 Armando Arsenal sa diin may kibyas ini nga igo sang bala sa iya nga ulo. Naigo naman sa dughan kag kamot si PO2 Joy Pabera sa diin ginpangdala ini sila sa Sipalay City Hospital matapos nga nagresponde ang iya mga kaupdanan. Upod man sa amu nga police operation si PO1 Cyril Bañaco sa diin mga katapo ini sila sang Regional Mobile Force Battalion nga nakabase sa Barangay 4, syudad sang Sipalay lakip man tatlo pa gid ka mga katapo sang Regional Public Safety Batallion.
Sa imbestigasyon sang dyHB, nagbato ang suspek nga si Emerson Antepaso, Jr. sang ginhimo ang pagserbe sang mga otoridad sa kaso sini nga murder. Nagpalupok ini gamit ang ginahuptan nga didose ukon shotgun, naigo ang duha ka mga pulis, nga amu naman ang rasun kon ngaa nga ila gintiro si Antepaso.
Si Antepaso ang napatay matapos ang insedente sa diin ang mga pulis nga pilason ang gintabangan naman dala sang grupo ni PO1 Bañaco pakadto sa highway, mga isa pa ka kilotero nga lalakton. Si PO2 Arsenal ang ara lang nagpabilin sa Sipalay City samtang gindala naman sa pribado nga ospital sa Bacolod si PO2 Pabera.
Subong lang nga gab-i may tatlo ka mga lalaki nga nagasinggitan sa Infirmary nga magabalos sila sa natabo rasun naman nga nakaalerto ang Sipalay Police kag may augmentation force na gikan sa RPSB.
Photo: Si PO2 Pabera Tags: Visayas, dyhb, Bacolod
