BACOLOD CITY – Wala nakasalbar kag napatay gid ang mag-amay nga biktima sang hit and run kaina sang aga sa Brgy. Mandalagan, ciudad sang Bacolod.
Nakilala ang mga biktima nga sanday Dante Lascuna, 44 anyos ang edad kag ang iya bata nga si Rendel Lascuna, 6 ka tuig ang edad, lunsay pumuluyo sang Purok Carmencita, Brgy. Mandalagan, Bacolod City.
Base sa pagpangusisa sang Police Station 3, may mga las 6 kaina sang aga, natabo ang insidente sa Buri Road kon diin nabungguan sang isa ka Kia Rio nga salakyan ang trisikad nga ginasakyan sang mga biktima.
Ginpahayag nga ang salakyan ang ginapanag-iyahan ni Catherine Mationg, 37 anyos ang edad, taga Escalante kag temporaryo nga naga-istar sa Phase 3, Country Homes Subdivision, Brgy. Estefania.
Suno sa mga naka-kita sang insidente, babayi ang naga-maneho sang amo nga Kia nga nakabunggo sa mag-amay nga Lascuna.
Bangud sini, gilayon nga ginpadulungan sang mga police ang address sang driver sang salakyan kag nakita didto ang Rio apang wala si Mationg./dyHB BACOLOD
