Wala na sang kabuhi ang mag-asawa sang nasapwan sa sulod sang ila balay sa Purok Maligaya, Barangay Magsaysay, syudad sang Koronadal pasado alas 10 sang aga kahapon nga adlaw, Pebrero 24, 2020.
Ginkilala ang mag asawa kanday Arturo Aquino, 68- anyos, retired Philippine Constabulary kag Erlinda Aquino, retired midwife pareho residente sa namensyunar nga lugar.
Base sa imbestigasyon sang Koronadal City Police station, isa ka Melvin Ramirez, trabahante sang mga biktima ang nagsulod sa balay sang mga suspek para mag- inom sang tubig, apang ginkakibot sini sang makita ang bangkay ni Erlinda nga wala na sang kabuhi kag duguan.
Gilayon nga nagpangayo sang bulig ang testigo kay Rodrigo Leal nga utod ni Erlinda sa diin nakita ang bangkay ni Arturo sa sulod sang iya kwarto nga wala na sang kabuhi.
Dugang pa nga imbestigasyon, pareho may inagyan sang buno gamit ang kutsilyo ang mga bangkay sang biktima.
Sa hot pursuit operation sang Koronadal City PNP, arestado ang ginapatihan suspek sa krimen sa Purok Cabaylo, Barangay San Roque, syudad sang Koronadal nga ginkilala kay Paul John Membrado, 19-anyos, soltero , residente sang Purok Maligaya, Barangay Magsaysay, syudad sang Koronadal.
Narekober sa suspek ang duha ka kutsilyo nga ginabulubanta 13 ka pulgadas ang kalabaon.
Sa subong ginaimbistigaran pa ang motibo sa krimen.
Kaso naman nga 2 counts of murder ang iapsaka batok sa suspek.
