KALIBO, AKLAN — Patay rong daywa ka mag-ingkampod matapos nga magkaeaeomos kahapon it hapon sa Sitio Punta, Brgy.Mambuquiao, Batan, Aklan.
Rong mga biktima hay nakilaea kanday Jayven Bolivar, 24-anyos ag Renevy Nabuab, 13-anyos tanan residente it nasambit nga barangay.
Sa report nga nabuoe it RMN DYKR Kalibo nga nag-adto igto rong magkaeampod ag may anda pa nga mga kaibahan para kunta magbuoe it shell ag nag adto pa gid sanda sa may maeagko nga bato kung sa siin mabaskog rong sueog rason nga inanod ra sanda ag nagkaeaeomos.
Mag-eowas sa mga namatay hay may kaibahan pa ra sanda nga sanday Renz Nabuab, alyas “Eng-Eng”, 12-anyos ag Reniel Bolivar, alyas “Ambao”,7-dag-on.
Suno sa panaysayon ni Renz nga ko una hay taga dughan malang ro tubi ugaling ko ulihi hay medyo naga os-os rong andang ginatindugan ag inanod sanda.
Napan uhan eon lang it mga nagrescue ko ulihi nga naga tombo-tombo sa tubi sanday alyas Eng-Eng ag Ambao ag sanda ra ha rescue eagi pero rayang sanday Jayven ag Renevy hay uwa eagi makita.
Suno kay Jomar Parohinog sambilog sa mga nagrescue nga mga alas 6:00 kabii hay nakita rong eawas ni Jayven maeapit man sa lugar ugaling uwa eon raya it kabuhi.
Rayang si Jayven hay bag-o eamang graduate ag kakapasar sa board exam bilang maestro.
Bangud sa madueom eon kabii hay ginpundo eon lang ro search and rescue kay Renevy ag kaina agahon hay ginpadayon ro search and retrieval operation ag mga alas 8:45 kaina hay nakita ro anang eawas nga naga sab-eay sa bato.
Pero bago man raya makita hay natigayon nga makapangayo pa sanda it bulig sa sangka manogban-aw dahil nga uwa it naga porsige nga mag eonip.
Suno sa manogban-aw nga una malang ro eawas ni Renevy, naeomos kuno bangud ginkopkopan it syokoy. Ana man nga ginpahayag nga may nina sa tuo nga dueonggan ro biktima ag siki ag raya hay naging matuod tanan.
Ginasugid nga ro nasambit nga lugar hay may mga nauna eon nga natabong pagkaeomos ag gina sugid palhi.
TAGS DYKR KALIBO BATAN MAMBOQUIAO
