Buruanga, Aklan – Nakaangkon it tama it pagbuno sa tuo nga dughan rong eaeaki matapos nga binuno it gunting ko babaye kabii sa Sitio Angayan, Brgy. Nazareth, Buruanga, Aklan.
Ro biktima nakilaea kay Paciano Sualog, 24-anyos ag rong suspek nga anang live-in partner hay nakilaea kay Margie Idano, 23-anyos tanan residente it nasambit nga lugar.
Suno kay PO2 John Zolina it Buruanga MPS nga nakabaton sanda it report kabii nga may unang kaso it pagpamuno ro natabo ag anda man nga gin respondehan.
Sa imbestigasyon naga guwa nga kabii nag-away rong mag live-in matapos nga palukong nag-eaong rong babaye nga mapanaw it Manila para nga mag usoy it ubra para sa andang pamilya.
Naakig rong eaeaki bangud nga palangga nana ro anang live-in partner ag uwa imaw naila nga magbueag sanda it maeayo.
Sa rayang punto hay naghambae ra imaw nga kon mawron malang nga aywanan imaw mapakamatay eon lang raya ag gintaw-an pa nana it gunting rong anang live-in para nga rato ibuno kana.
May pagdueomugan pa nga natabo hasta imaw ra nahabun-an.
Una nga gindaea sa Buruanga District Hospital rong biktima, pero ginrefer dayon sa Malay Baptist Hospital ag gin refer man dayon sa Aklan Provincial Hospital.
Samtang bulontaryo man nga nagsurrender dong babaye sa Buruanga PNP ag naka detained.
Uwa man it plano nga magpasaka it kaso kuntra kana rong eaeaki ag pati ro pamilya pero ginahueat pa man nga maka execute it affidavit of desistance or no interest to file charges ro pamilya.
