BACOLOD CITY – Life imprisonment ukon pagkabilanggo tubtub nagakabuhi ang gin-sentensya sang korte sa mag-utod nga lalaki matapos napamatud-an guilty nga nagbaligya sang illegal nga druga sa balor nga P500 pesos.
Ang mag-utod nga nakilala nga sanday Joseph kag Erwin Balsomo Lo ang nadakpan sa ginpatigayon nga buybust operation sang mga ahente sang PDEA sa Purok Lubi, Brgy. 3, Bacolod City sadtong October 16, 2014.
Ginpapanaug ni Honorable Judge Raymond Joseph Javier sang Bacolod RTC Branch 52 ang pamatbat sa mag-utod matapos napamatud-an ini sila nga guilty sa pagbaligya sang .0599 grams sang suspected shabu sa mga ahente sang PDEA.
Wala labot sa life imprisonment, sanday Joseph kag Erwin ang ginmanduan man sang korte nga magbayad sang kapin P500 mil pesos nga penalidad.
Samtang, sang ginpatigayon ang operation, si Erwin ang nakuhaan pa sa iya possession sang kapin 24 tanan ka mga Diazepam, isa ka makatalagam nga bulong gani ini siya ang ginsentesyahan sang dugang nga 12 ka tuig kag 8 ka bulan tubtub 17 ka tuig kag 8 ka bulan nga pagkabilanggo kag penalidad nga P300 mil pesos./dyHB BACOLOD
