Patay ang magtiayon nga apohan human gilamon pag-apil sa dakong kalayo nga miugdaw sa ilang panimalay adtong milabayng martes sa may alas 9:30 sa gabii didto sa P-15, CMU-Musuan, Dologon, Maramag, Bukidnon.
Giila ang magtiayong namatay nga sila si Fedencio Joromat y Fruta, 89 anyos ug ang iyang asawa nga si Condrada Joromat y Santiago, 83 anyos.
Sumala sa gisaysay sa ilang tulo (3) ka mga apo, nga sa wala pa ang nahitabong insidente, gisugo pa sila sa ilang apohan aron sa pag palit og kandila tungod kay walay kurenti og dayong nangatulog, apan kalit lamang sila nga nakamata tungod sa singgit sa ilang lola nga ipauna sila sa paggawas human nga aduna nay dakong kalayo sulod sa ilang panimalay.
Luwas nga nakagawas ang tulo ka mga apo sa mga biktima, apan gilamon na pag-apil ang magtiayon sa dakong kalayo adtong higayona.
Hugot nga panghimangno karon sa Bureau of Fire and Protection (BFP) sa Maramag sa katawhan nga mag-amping kanunay aron nga mahilikay sa posibleng mahitabong sunog.
