Gipanghimakak sa kompanyang Verde Soko Philippines Industrial Corporation nga makadaot o piligro ang mga basurang gipasulod nila sa Phividec Industrial Estate sa Tagoloan, Misamis Oriental nga gikan pa sa South Korea.
Kini sukwahi sa migawas nga reklamo nga ang maong mga basura dunay plastic diapers, used medical kit ug mga electrical tube.
Nasayran nga ang maong kompanya dunay planta sa Sitio Buguac, Barangay Sta. Cruz, Tagoloan, Misamis Oriental nga mao untay moproseso sa mga soft plastic materials.
Matud sa Presidente sa maong kompanya nga si Engr. Neil Alburo nga pinaagi sa ilang kompanya makatabang sila sa pagpreserba sa kinaiyahan.
Gibutyag niini nga kung masugdan na ang ilang operasyon, posibling wala nay mga cellophane nga ipanglabay bisan asa kay mapuslan naman kini ug posibling dili na sili mokuha gikan sa nasud sa Korea.
Matud usab ni Engr. Alburo nga makatabang usab sila sa mga residente alang sa ilang panginabuhian kay manginahanglan naman sila og trabahante.
Gipasabot usab ni Engr. Alburo nga ang pag proseso, isulod kining mga soft plastic waste sa segregation machine aron ilain-lain, dayon isulod sa shredding machine aron gamay-gagmayon, dayon sa washing compartment aron hinloan, ayha ibutang sa extruder machine nga maoy motunaw sa soft plastic waste aron maproseso nga mahimong plastic brackets, una mahimong pellets diin kining pellets mao dayon ang ilang i-export sa China ug Korea aron himoong mga plastic table, plastic chairs ug uban pa.
