Davao City – Giuyonan karon sa usa ka opisyal sa Department of Health kun DOH ang pagpatuman sa mandatory nga RT-PCR ug X-ray tests sa mga magpa-admit ug magpa-opera sa ospital dinhi sa Davao City.
Sa pakighinabi sa DXDC RMN Davao kang DOH Undersecretary Dr. Leopoldo Vega, giingon niini nga tama ra ang lakang sa Local Government Unit kun LGU sa Davao City bahin sa nahisgutan alang usab sa proteksyon sa health workers kontra COVID-19.
“Tama na… Amo na nang giplanuhan nga ang mga pasyente nga mag pa-opera, kinahanglan ma-test sa COVID kay lisod kaayo ma-expose ang non-COVID nga mga trabahante,” segun ni Vega.
Subay niini, nabalaka ang publiko sa maong mando basin madak-an na hinuon sa gasto apan gisulti ni Vega nga covered sa Philhealth ang mga nasangpit nga tests sa mga pasyenteng magpa-admit.
Kahinumduman nga nagpagula og Executive Order (EO) No. 53 Series of 2020 ang gobyerno sa Davao diin gimando karon ngadto sa mga hospital sa syudad sa Davao nga mag require na og negative RT-PCR test ug negative X-ray result sa Pneumonia sa mga pasyente for admission ug surgery alang sa proketsyon usab sa mga health workers.
RadyoMaN Renz Barbarona
