Naghikog patay ang 32 anyos nga manikurista nga nailang si Sheila Palad sulod sa ilang balay sa Relocation, Barangay Pagatpat ning syudad.
Gipahayag ni Police Capt. Jason Sto. Domingo, ang station commander sa Bulua Police station nga patay na nilang naabtan ang biktimang naglingkod sa bangko sulod sa balay niini.
Dugang pa sa maong opisyal, nga mga alas-12:50 sa udto usa ka Kagawad Moriel Guanzon sa maong barangay ang mitawag sa ilang buhatan ug nagpahibalo kalabot na sa maong insidente.
Kauban ang Oro Rescue sa maong dapit, ilang nasayran gikan sa anak sa biktimang si Keisha nga mga alas-11:30 sa buntag niadtong Lunes, nakit-an na lamang niyang nagbitay ang iyang inahan sa steel rod sa pader sa ilang balay ug adunay hikot sa liog nga color yellow nga nylon rope.
Tungod niini, dali niyang giputol ang pisi ug gipalingkod sa kawayan nga bangko ang iyang inahan ug dayong pangayog tabang.
Samtang, gibutyag usab ni Keisha nga sa wala pa naghikog ang iyang inahan, nakalalis na niini sa buntag pa lamang ang iyang stepfather nga si Roy Anthony Ortiz, 35 anyos ug construction worker gumikan matud pa sa kwarta ug utang.
Alang usab sa silingan sa biktima nga si Chelo Cabañez, nga mga alas siete sa buntag sa samang adlaw, nakita pa niya si Sheila nga nanglimpyo sa gawas sa ilang balay ug pagkahuman daling misulod sa ilang balay apan wala na dayon kini migawas pagbalik.
Sa karon, anaa na sa Bollozos funeral parlor ang patayng lawas ni Sheila ug gitambagan ang pamilya nga ipa-otopsiya ang patayng lawas sa biktima aron gayod masayran ang tinuod nga hinungdan sa kamatayon niini.
