Kalibo, Aklan – Patay rong sangka manugbaligya it isda matapos nga binuno man it isigkapareho nga manugbaligya sa Kalibo Public Market kabii.
Ro biktima nakilaea kay Rexiel Inserto @ “Burnok”, 26-anyos ag residente it Brgy. New Buswang nga nakaangkon it tama it plamingko sa likod, samtang rong suspek nakilaea kay Marlon Plana, 33-anyos ag residente it Calachuchi Road, Andagao.
Nasayuran nga nagatalikod rong bitkima tag gulpi nga binuno it suspek.
Insigida nga gindaea sa Aklan Provincial Hospital ro biktima pero ginbawian raya it kabuhi samtang ginabueong.
Naeagyo man ro suspek matapos nga makometar rong krimen pero ko ulihi imaw nagpabutyag nga ma surrender kay Poblacion Punong Barangay Niel Candelario ag raya natigayon.
Gin-ako it suspek nga anang habuno ro biktima ag suop gid ro kapin 15 pulgadas nga plamingko nga anang gingamit.
Suno kana nga kahapon hay naka inum imaw, nag abot si Burnok ag medyo maangas rong dating ag nagapasikat. Ana ra nga ginsaway ugaling uwa magpati rason nga anang binuno.
Haum man imaw suno kana nga batunon kung ano ro magiging sintensya kana ag pasensyahon eang imaw ay mawra ro natabo.
Sa makaron detained sa lock up cell it Kalibo PNP rong suspek ag pagapasakaan it kasong MURDER hinduna.
