Gipasalig karon sa palasyo sa Malacañang nga ‘welcome’ alang kanila ang laraw ni bisan kinsa nga imbestigahon kun aduna bay nahimong kalapasan ang nasudnong kasundaluhan samtang nakiggubat kontra sa Maute-ISIS sa Marawi City.
Sa regular news briefing kaganina, gisugilon ni Presidential Spokesperson Undersecretary Ernie Abella nga andam ang mga kadagkuan nga mo-asistir sa mga imbestigador sama sa Commission on Human Rights (CHR) kun gikinahanglan.
Sa pikas bahin, gisugilon sa tigpamaba nga mas maayong hulaton ang opisyal nga kumpirmasyon sa mga awtoridad kun cierto ba nga napatay gayud sa mga operatiba sa Marawi ang pinangita nga usaka ‘Dr. Mahmud Ahmad’ nga gikatahong usaka foreign-trained Malaysian academician ug expert sa Islamic law ug jurisprudence.
Adunay mga report nga laing 13 ka mga Maute ‘stragglers’ patay sa pinaka-latest encounter sa battle area kagabii diin gikatahapang lakip sa napatay mao si Ahmad.
Si Ahmad gituhuang financier sa Maute-ISIS gikataho usab nga nagbansay sa usaka Al-Qaeda training camp sa nasud sa Afghanistan niadtong 1990s.
Padayon pa usab nga gitino sa palasyo ang mga detalye sa pagka-aresto sa usaka babayeng Pinay nga ISIS recruiter giila nga usaka Karen Aisha Hamidon gituhuang ‘biggest honey trap recruiter for ISIS’ kinsa ka-relasyon sa usaka teroristang arestado sa Sarangani nga naka-link sa Ansar al-Khalifa ug gidudahan usab nga may kalambigitan sa Roxas Night Market bombing niadtong September 2, 2016.
RadyoMan June Duterte
