Nakaalerto karon ang mga personahe sa Maritime Industry Authority o MARINA dinhi sa Northern Mindanao alang sa Oplan Semana Santa nga nagsugod niadtong Abril 8 hangtud Abril 25.
Ilang gitutukan ang siguridad sa tanang pasahero sa matag pantalan dinhi sa rehiyon nga gilaumang modagsa sa Agutayan Island ug Opol beach, Balingoan Port sa Misamis Oriental, Balbagon sa Camiguin, Yumbing ug San Roque, pantalan sa Mukas, Lanao del Norte ug Ozamis port sa Misamis Occidental.
Pinaagi sa pakigtimbayaong sa Philippine Coast Guard ug Philippine Ports Authority, gibutyag ni Marina-10 Director Felisa N. Orongan nga magpahigayon sila sa maritime safety monitoring activities aron masiguro ang kaluwasan, siguridad ug kahamugaway sa mga pasaherong mobiyahe karong Semana Santa.
Lakip sa monitoring activities mao ang pagsuta sa mga nakasakay nang pasahero alayon sa kamandoan sa Department of Transportation pinaagi sa Special Order 041 series of 2019.
