BACOLOD CITY – Ginpangunahan ni Mayor Evelio Leonardia ang pag bukas sang ika-39 anyos nga Masskara Festival kadungan sa ika-80 anyos nga kaadlawan sang syudad sang Bacolod sa Bandstand sa Bacolod public plaza.
Nangin dinapit nga besita si MTRCB Director kag artista nga si Kate Brios.
Yara man sa kahiwatan sanday City Administrator Atty. John Orola Vice Mayor El Cid Familiaran, Councilors Bart Orola, Cindy Rojas, kag Em Ang.
Napalibutan sang nanuhay tuhay nga duag sang balloon ang bandstand kag may madamo nga cake bilang pagdumdom sang kaadlawan sang Bacolod.
Sa mensahe ni Leonardia nga ang pagsaulog sang Masskara Festival ang ginahalad gid sa mga Bacoleños bangud indi ini matigayon kun wala ang mga pumuluyo nga naga suporta.
Pagkatapos sang mensahe sang alkalde iya na pormal nga ginbuksan ang ika-39 anyos nga Masskara Festival.
Ginsundan ini sang pagsaot sang Masskara dancers, fireworks display kag zumba.
Sa pihak nga bahin nangin maidid naman ang kapulisan sa pagbantay sang nagasulod kag nagagwa nga mga tawo sa public plaza agud malikawan ang pagsulod sang mga hinganiban sa festival site./ Grace Supe
