Gin-pulong na kahapon ni Bacolod Mayor Bing Leonardia ang mga barangay officials angot sa memorandum circular sang Deparment of Interior and Local Government nga dapat e-reclaim sang gobierno ang tanan nga mga public roads nga gina-gamit na sang mga pribado.
Lakip sa mga nagtambong sa meeting sa New Government Center para sa implementasyon sang clearing operation ang; City Legal Office, City Engineers Office, Bacolod Traffic Authority Office – BTAO, Bacolod City Police Office – BCPO, Bacolod Housing Authority-BHA kag iban pa nga mga concerned agencies.
Suno kay Leonardia nga sumugod karon nga adlaw (August 2), magapadala sang notisya ang mga barangay officials sa mga tag-iya sang illegal structures para sa boluntaryo nga pag-guba sang ila tsange, balay kag anuman nga estraktura.
Ang voluntary demolition ang patigayunon sa sulod sang napulo ka adlaw (10 days).
Pagkatapos sang napulo ka adlaw kag kon wala sagihapon naguba ang mga illegal structures, ang barangay na mismo ang magapatigayon sang demolition.
May yara naman sang monitoring team ang syudad agud mapasiguro nga naga-sunod ang mga opisyales sa memorandum circular sang DILG ilabi na nga 60 dias lang ang ginhatag sa mga LGUs para sa clearance sang mga obstruction kag illegal structures.
Pagkatapos sang 20 days, kinahanglan nga mag-report sa city hall ang barangay kapitan sa progress sang ila nga clearing operations.
Pabutyag ni Mayor Bing nga dapat seryosohon sang tanan ang mandu ni President Duterte kag ni Sec. Año bangud nga may yara sang correspending penalty ang mga local officials nga INDI mag-sunod sa ginpa-gwa nga memo.
Samtang, magpadala naman sang SWAT ang Bacolod City Police Office sa mga barangay nga naga-kinahanglan sang police assitance.
Sa pihak nga bahin ang BTAO, magapatigayon man sang seperado nga operasyon angot sa pag-clear sang dalan particular ang mga no parking zone.
Suno kay Mayor Bing,”wala kita choice kundi mag-cooperate kag magparticipate sa mandu sang presidente kag memo sang DILG.”
