“Basura.”
Daya do mabahoe nga gina pangatubang nga problema ko banwang Malay sa isla it Boracay ko mga nagtaliwan nga dinag-on hasta ko nagtaliwan nga buean.
Pero sa makaron indi eon makabig nga basura ro pinaka-main problem kung nasambit nga banwa bangod sa raya hay hataw-an eon it naga-kaigo nga solusyon sa pagbueoligan ko mga nagakasari-sari nga ahensya ag stakeholders sa Malay ag Boracay.
Ro basura sa Boracay eabi eon sa Manoc-manoc MRF hay hadaea eon tanan sa landfill sa mainland Malay ag uwa eon it tambak nga basura sa isla nga kung dati hay haeos bukid-bukid ro kaabuon kara.
Dahil sa kadaeag-an nakabaton it maabong pagpasidungog si Mayor Ciceron Cawaling halin sa mga taga Malay ag Boracay eabi eon sa mga stakeholders ag gobyerno bangod nga hataw-an it solusyon do mabahoe nga naging problema ko Boracay.
Mabahoe man do pagpasaeamat ni Mayor Cawaling sa mga tawo nga nagbulig kana sa andang kadaeag-an eabi eon sa mga truck nga ana it haulers para sa paghakot ko basura.
Samtang padayon man gihapon sanda nga naga panawagan sa tanan nga mga taga isla nga makipagbueoligan kanda para nga maging padayon nga malimpyo do Boracay ag indi eon mauman nga magtambak do maabong basura.
