Roxas City, Capiz- Ginpabakod na sang Kamara ang House Bill 8140 o Media Workers Welfare Act. Sa boto nga 218, lusot na sa ikatlo kag ulihi nga pagbasa ang hagna nga hatagan sang proteksyon, seguridad kag maayos nga benepisyo ang mga media practitioners sang pungsod.
Sakop sang proposed bill ang pagahatag sang nagakaigu nga sweldo, security of tenure, hazard kag overtime pay, insurance kag iban pa nga benepisyo para sa mga media workers. Kalakip diri ang pagka- myembro sang Social Security System, Pag-IBIG, kag Philippine Health Insurance Corporation sa oras nga mabaton sa trabaho.
Ginapakusiderar nga regular employee ang isa ka media worker matapos ang anum ka bulan sang tayuyon sini nga employment.
Ang mga miyembro naman sang media nga manduan nga mag-cover sa dangerous kag hazardous events okun situations ang pagahatagan sang dugang nga ₱500 nga daily rate maluwas pa sa protective gears okun equipment.
Ginapahatagan man sang insurance ang mga media workers sang ₱200,000 death benefits, ₱200,000 disability benefits, kag ₱100,000 nga medical insurance benefits.
Samtang magatukod naman sang isa ka Media Tripartite Council nga amu ang magapasiguro nga masunod ang paghatag proteksyon sa mga media workers.
