Banga, Aklan — Dead on arrival sa Aklan Provincial Hospital rong sangka meyembro it Philippine Marines matapos nga maaksidente sa motorsiklo kabii sa Brgy. Linabuan Sur, Banga, Aklan.
Ro nasambit nga biktima nakilaea kay Sgt. Michael Romero, 37-anyos ag residente it Brgy. Paningayan, Madalag, Aklan nga nakaangkon it fatal nga lastro sa ueo.
Suno kay PO2 Danilo Dalida it Banga PNP nga naga maneho it anang motorsiklo ro biktima pa direksyon it Banga halin Kalibo samtang rong kotse nga ginamaneho ni Jonathan Lais it Linabuan Sur hay halin sa Banga pa direksyon it Kalibo pero pag abot sa lugar hay gulpi bumunggo rong motorsiklo sa kotse nga nagapaliko pa waea.
Nasayuran nga nakainum si Romero ag uwa it helmet tag matabo rong aksidente.
Sa makaron hay temporaryo nga gin constudy it Banga PNP si Lais ag ginahueat ro pamilya it biktima para nga maka istorya kon ma settle pero kon indi hay iga plastar rong kaso it Banga PNP nga reckless imprudence resulting to homicide.
