By: Joanna Ricote
Laing hugna sa mga hinabang ang gitunol sa RMN-dxCC karong adlawa alang niadtong mga nasunogan og panimalay sa Block B Accreation Brgy. Macabalan, o naila sa tawag nga Brgy. Langgaw.
Personal nga gitunol ni Atty. James Judith, ang 5 ka sako ug 5 ka selopin nga adunay sulod nga mga used clothing, nga gikan sa mga tigpaminaw sa dxCC, 15 ka pares sa mga bag-ong mga tsinelas, gikan ni Atty. Ernie Palanan ug balor 100 nga mga packs sa fresh pancit ug canned goods gikan ni Atty. James Judith.
Gitunol kini ni Atty. Judith ngadto kang Mr. Josue Gequilan, usa sa mga nasunugan.
Gawas sa mga hinabang, nagpakitabang usab ang usa ka residente sa maong dapit, human nga nasunog ang iyang mga importanteng dokumento, hinungdan nga gipasaligan kini nga Atty. Judith nga tabangan sa ilang Affidavit of loss, nga kinahanglanon aron nga makakuha pagsubli sa maong mga dokumento.
Mahinumduman nga niadtong Enero 7 ning tuiga, dihang nahitabo ang sunog sa maong dapit, kung asa mikabat sa 45 ka mga panimalay ang na-ugdaw sa maong sunog kung asa gibana-bana nga mikabat sa kapin 1.9 million pesos ang natalang damyos.
Kini na ang ikaduhang hugna sa pag panghatag og mga hinabang sa RMN-dxCC, alang sa maong mga biktima.
