Natansan ug grabeng pagkakumi sa tricab, human kini mibangga sa walang bahin sa sampot sa Cugman nga jeep, kaganinang pasado alas-5:30 sa buntag sa may Baloy, Brgy. Tablon ning syudad.
Gibutyag sa usa ka Jimenez Labadan, nga samtang nagdagan ang ilang gisakyang tricab pauli dinhi sa syudad, mihimo sya pagtagpilaw apan kalit na lamang siyang nakamata human mabati ang kusog nga pagbundol sa tricab ngadto sa sampot sa jeep.
Tungod niini, nalamba silang upat sa maong sakyanan kung asa ang driver nga nailang si Charito Pahunang maoy nagrabihan, human kini naipit sa maong sakyanan.
Gipahayag sa live-in partner ni Charito nga si Renebhe, nga karon pa kini nahitabo sa iyang kapikas kinsa anaa na karon sa Northern Mindanao Medical Center, human kini makuha sa iyang gimanehong tricab.
Samtang……
Gibutyag sa driver sa jeep nga si Aljan Habagat, 23 anyos nga gikan siya nagpa-washing sa Baloy ug mi-parking lamang siya sa Mindanawan area tungod kay aduna kini gi-check sa iyang jeep, apan wala kini makababag sa dalan tungod kay nakagawas na kini sa lane.
Gani sa iyang pagsakay aron unta molarga na, kalit na lamang niya nabati ang kusog nga pagboto sa likod nga bahin sa iyang gimanehong jeep, ug sa pagtan-aw niini nagbitay na sa seatbelt ang usa ka pasahero sa tricab.
Gipahayag ni PO3 Rolando Resurecion, ang traffic investigator sa Cugman Police Station nga conscious hinuon ang upat ka pasahero, apan usa niini ang nagrabihan ug kini mao ang driver nga si Pahunang.
Giila usab ni Resurecion ang mga biktima nga sila si Jimenez Labadan, Christopher Macas, Zaldy Pagtalunan ug Charito Pahunang.
Sa karon padayon pang giatiman sa mga doctor sa NMMC ang mga biktima, human kini makaangkon og mga samad ug bun-og sa lawas.
