BACOLOD CITY – ( Metro Inn Stand-off ) Amat amat na nga nakagwa ang mga guest nga naka check-in sa Metro Inn Hotel sa 6th Street Bacolod City apang padayon gihapon nga sirado matapos nagluntad ang standoff ukon tensyon sang ini ang ginsulod ni Mr. Francis Cabuga kag sang iya abogada nga si Atty. Erfe del Castillo.
Ginpahayag nga pasado las 9 kagab-i sang nag-abot si Mr. Cabuga sa Metro Inn upod ang iya abogado nga si Atty. del Castillo kag napulo ka mga security guards agud nga ini ang ipasira para sa gina-claim sini nga audit kag inventory.
Nagluntad ang tensyon matapos ginpahalin ni Mr. Cabuga ang duha ka security guard nga naka duty sa amo nga tion kag ginpa take-over ang iya dala nga mga gwardiya kag wala sang may ginpasulod nga iban lakip na ang iya asawa nga si Mrs. Cathy Cabuga nga amo na karon ang nagadumala sang hotel.
Base sa pahayag ni Mrs. Cabuga paagi sa iya abogado nga si Atty. Jomax Ortiz, nagtungaay na sila sang property sang iya bana kag ang Metro Inn nagkadto na sa iya pagdumala.
Sa gwa sang hotel nagbutang man sang karatola ang grupo ni Mr. Cabuga nga “No Trespassing, Private Property.”
Bangud sini, napilitan naman si Mrs. Cathy Cabuga nga magpatawag sang pulis paagi kay PSSupt. Francisco Ebreo agud nga maareglo ang tensyon nga gintuga sang amo nga pag take-over ni Francis.
Suno sa abogado ni Francis nga si Atty. Erfe del Castillo nga wala sang problema ang ila pag sulod sa hotel kag wala man sila nagpang-gamo bangod gusto nila matawhay ang ila tuyo nga audit kag inventory.
Ang pagsulod nila isa ka corporate act, santo man sa board resolution sa diin ang CEO sang Mushroom Realty and Development Corporation, sa diin sa idalom sini ang Metro Inn Hotel amu si Mr. Cabuga.
Apang sang ginpamangkot ngaa gab-i ang ila audit kag inventory, wala man ini nasabat derekta ni Del Castillo.
Sa bahin naman sang abogado ni Cathy na si Atty. Jomax Ortiz, ginapanindugan sini nga ang Metro Inn Hotel ang gina-manage ni Cathy sa malawig na nga tinuig kag indi ni Mr. Cabuga.
Ginklaro ni Ortiz nga kon may mga plano man si Francis nga mag take-over dapat ini ang iya ginpaagi sa ensakto nga proseso pinaagi sa pagfile sang kaso sa korte kag indi sa amo nga pamaagi nga hinali na lamang ini nga nagsulod sa establishment kag nagpang-kandado, kag wala man gani abiso sa mga hotel guest sa amu nga gab-i.
Mahimo man nga makafile ang mga guest sang illegal detention kontra kay Mr. Cabuga kag Del Castillo bangod wala nakaguwa ang mga ini sang pila ka oras.
Angut naman sa walo ka mga security guards nga gindala ni Mr. Cabuga sa hotel, ginsiling sang pulis nga wala sang problema ang mga papeles sang armas apang magapangatubang sang kaso ang security agency bangod wala sila sang permit to transport firearms.
Sa karon padayon ang negosasyon nga ginapatigayon sang Bacolod City Police Office, sang mga abogado sang magtimbang nga bahin para ma resolve na ang tensyon nga nagtuga naman sang pagsira sang portion sang 6th Street humalin pa kagab-i./dyHB BACOLOD
