BACOLOD CITY – Isa patay isa nasamaran sa grupo sang mga pamatan-on nga naghalin sa isa ka bilasyunan kahapon sang kaagahon sa Brgy. Estefania, ciudad sang Bacolod.
Nakilala ang biktima nga napatay nga amo si Regie John Semillano, 15 anyos ang edad, residente sang Purok Fortune Town kag ang nasamaran amo si Dominic Espelosa, 15 anyos sang Purok Pag-asa, tanan sang Brgy. Estefania.
Suno kay Espelosa nga may mga las 12 kahapon sang kagab-ihon, siya kag ang biktima nga napatay lakip na ang 3 ka iban pa nila nga barkada ang nagkadto sa isa ka bilasyunan sa ila man lang lugar.
Apang, ini sila ang nag-gwa agud nga magbakal sang sigarilyo, apang nakibot sila sang hinali na lamang ini nga ginpalukpan sang wala makilala nga 2 ka mga suspek sakay sang motor.
Ang biktima nga napatay nakaangkon sang igo sa iya likod kag gindala pa sa Corazon Locsin Montelibano Memorial Regional Hospital apang gin-deklar nga dead on arrival.
Samtang, si Espelosa naman nag angkon sang igo sa wala nga kamot nga padayon karo ginabulong sa amo man nga ospital./dyHB BACOLOD
