General Santos City – PATAY ang wala pa mailhing suspek atol sa nahitabong engkwentro tali sa kapulisan nga sakop sa Polomolok Municipal Police Station human kining misuway ug sulong sa gihimong check point sa may Purok Malipayon, Barangay Lumakil , Polomolok kagabie.
Sa pakighinabi sa Rmn Gensan ngadto kang Police Sr. Inspector Romeo Albano Jr. , Deputy Chief Of Police sa Polomolok Municipal Police Station nasayran nga sila nakadawat ug report gikan sa mga concern Citizen nga adunay namatikdang upat ka mga tawo nga sakay sa duha ka mga motorsiklo nga kakudahan ug lihok didto sa maong lugar.
Diha diha dayon nagbutang ug check point ang kapulisan sa may Purok Malipayon, Barangay Lumakil Polomolok.
Samtang gihimo ang check point, kalit miabot ang tulo ka mga lalaking sakay sa usa ka motorsiklo, usa kanila ang nagpabuto ug armas paspas usab nga nakabalos ang mga pulis diin usa ang naigo sa bala sa pusil gikan sa kapulisan samtang paspas nga nakasibat ang duha niini ka kaubanan.
Gidala pa sa ospital ang suspek apan gideklara kining dead on arrival. Sa karon padayon ang gihimong imbistigasyon sa kapulisan kalabutan sa insidenti ug ginasuta kung aduna bay grupo ang mga nahisgutan ug unsay ilang motibo sa pag-atake sa mga pulis.
