Nasuta na sa National Telecommunications Commission kon NTC Region 10 ang mga mga legal ug illegal nga mga radio station sa probinsiya sa Bukidnon.
Sa interview sa RMN Malaybalay ngadto kang Engr. Teodoro Buenavista, ang regional director sa NTC sa rehiyon gibutyag niini nga nabuhatan na nila kini ug report ug naduso sa ilang central office.
Gipasabot niya nga wala sa ilaha ang otoridad nga mo-mando nga ipasirado o ipahunong ang operasyon sa usa ka radio station kung walay order gikan sa komisyon hinoon ang ilang head office maoy mo-desisyon kung kini ba sirad-an o kaha pasakahan ug kaso.
Matud ni Engr. Buenavista nga tungod sa kanunay nilang pag-inspeksiyon sa mga radio station sa probinsya, daghan na usab ang mga nakakuha ug provisional authority.
Sigun niini nga magpadayon ang ilang pagmonitor ilabina nga hapit na usab ang eleksyon.
Gidugang pa sa regional director nga usa sa mga rason nga midaghan ang mga gipangtukod nga radio station kini tungod sa kagamay lang sa penalty.
Welcome usab daw niya ang plano ni Senator Grace Poe, nga mag-sponsor sa usa ka balaudnon nga mag-amenda sa Commonwealth Act of 1936 tungod sa kagamay lang sa penalty nga anaa lang sa 200 pesos.
Gipananglitan usab niya nga aduna silay napasakahan ug kaso apan sa paghuman sa pagdungog 7 mil lang hangtod 21 mil ang nabayran nga penalty.
