BACOLOD CITY – Iga-formalize sini nga adlaw ang pagpasaka sang kaso batuk sa 55 ka mga personalidad nga gindakup ginpatigayon nga raid sa apat ka mga lugar nga gina-okupar sang progresibo nga mga grupo sang nagligad nga October 31 sa ciudad sang Bacolod.
Suno sa Public Affairs chief sang 3rd Infantry Division sang Philippine Army, Cpt. Cenon Pancito III nga ang kaso nga igapasaka batuk sa mga ini ang nagalakip sang illegal possession of firearms and explosives.
Ginpahayag ni Pancito nga ginalantaw man ang pagpasaka sang kaso nga qualified human trafficking batuk sa ila matapos ginpahayag sang mga nadakpan nga menor de edad kon paano sila nga gin-recruit sang grupo.
Madumduman kapin sa 55 ka mga personalidad ang gindakup sa ginpatigayon nga sunod sunod nga raid sa mga lugar nga gina-okupar sang progresibo grupo nga Bagong Alyansang Makabayan (Bayan), Kilusang Mayo Uno (KMU), Gabriela, Anakpawis kag National Federation of Sugar Workers (NFSW) sa Brgy. Bata, Taculing kag Brgy. 33.
Na-cover sa amo nga raid ang 32 ka mga firearms, 130 ka round sang ammunition kag lima ka explosives lakip na ang mga subersibo nga mga dokumento.
