Gidasig sa mga misurender nga sakop sa New People’s Army ang ilang mga kaubang rebelde sa bukid, nga mobalik na lamang sa sabakan sa gobyerno.
Gibutyag sa 27 anyos nga si alyas Jojo nga nagpuyo sa Claveria, Misamis Oriental, nga usa siya sa 26 nga nakapahimulos sa programa sa gobyerno sama sa Enhanced Comprehensive Local Integration Program.
Matud ni Jojo, nga 22 anyos siyang misulod sa grupong NPA ug lima ka tuig na siyang nagtago-tago sa kabukiran apan wala sila makasinati og kaarangan, kon dili kalisod ang ilang gibati.
Alang usab kang alyas Jeric, nga naigo na lamang siya sa bala gumikan sa ilang pakiggubat apan kalisod lamang gihapon ang ilang naagian sa bukid, busa wala na siyay planong mobalik sa kalihokan.
Kini gumikan kay kontento na sila sa ayuda nga gihatag kanila sa gobyerno, alang sa ilang panginabuhian ug kaugmaon.
Tungod niini, gisaad sa kagamhanang local sa dakbayan ug sa militar nga tabangan ug suportahan sila, lakip na ang paghatag kanila og proteksyon.
