Gipahimangnoan sa Cagayan de Oro City Police Office o COCPO ang mga nagbaligya sa pabuto sa mga dili otorisadong lugar nga dakpon kini sa mga otoridad.
Kini ang gibutyag ni COCPO Spokesperson Mardy Hortillosa human namatikdan nga dunay mga nagbaligya sa pabuto sa Cogon Market.
Mahinumduman nga kagahapong adlawa nagpahigayon sa monitoring ug inspection ang COCPO kauban ang Regulatory and Complaint Board kung asa nasikop ang 13 anyos nga nagbaligya sa illegal nga pabuto sa Cogon Market.
Gipasabot ni Supt. Hortillosa nga bisan legal pa nga pabuto ang gibaligya sa mga merkado, dakpon gihapon kini sa mga otoridad.
Matud sa RCB nga sa karon duna nay pito ka lugar nga gihatagan og special permits nga pwede makabaligya sa pabuto.
Kini naglakip sa upat ka areas sa Lim ket Kai, usa sa SM Downtown Premier, usa sa SM City Uptown ug usa sa Rotonda, Barangay Nazareth.
