Gipasabot ni Misamis Oriental Gobernor Bambi Emano kon nganong gipatuman niini ang bag-ong ordinansa kalabot sa parking fee sa Kapitolyo Probinsyal human usa ka empleyado sa kapitolyo ang mikwestyon sa pagpatuman niini sa parking fee.
Matud sa gobernador, nga bag-o na ang ordinansang gipirmahan sa Sangguniang Panlalawigan busa kadto matud pang nakakuha og stickers niadtong 2017 ug matapos sa 2018 ang gikinahanglan nang mokuha pagbalik.
Gipahibalo usab sa gobernador nga 300 pesos ang bayad sa sticker sa mga empleyado sa Kapitolyo nga mo-parking ug dili exempted niini ang usa ka opisyal sa Sangguniang Panlalawigan, Department Heads ug uban pa.
Dugang pa ni Governor Emano nga kinsa mang empleyado sa Kapitolyo ang mosupak sa maong ordinansa ang mag-atubang sa salaod nga nakalatid niini.
Giklaro usab sa maong opisyal ang isyu nga matud pa gihimo niining negosyo ang parking fee.
Matud pa nga una nang gipahibalo ni Ms. Carol Lim, ang Assistant Provincial Administrator nga niadtong Enero gipatuman na ang ordinansa pinaagi sa SP Ordinance #1404-2017 nga giamendahan gikan sa unang SP Ordinance #733-2005, nga gipasubay sa 2005 Revenue Code of Misamis Oriental.
Kung asa gikan sa tag-dos pesos ang oras ni bisan kinsa nga mo-parking sa Capitol Park, gihimo na kini ngadto sa 10 pesos matag oras sa tumong nga mahapsay ang Capitol park ug maprotektahan ang mga sakyanan batok sa mga dautang elemento.
Busa ang mga empleyado sa Kapitolyo nga nagbaton og sakyanan ang gipakuha og sticker nga nagbalor sa 300 pesos matag tuig.
Tungod niini, ang mga tag-iyag sakyanan nga dili buot mobayad sa parking fee ang pagadalhon ang sakyanan sa motorpool sa kapitolyo aron didto kini nila lukaton.
By: RadyoMaN Ellah Baculio
