Nakigduyog karong adlawa, adlaw nga Lunes, ang mga opisyales sa probinsya sa Sarangani sa balaang pagtamod sa atong mga kaigsoonang Muslim tibuok Pilipinas sa Eid’l Adha, usa ka national regular holiday.
Ang Eid’l Adha, pinulungang Arabic nagpasabot nga Feast of the Sacrifice, ang usa sa duha (2) ka dakong selebrasyon sa relihiyong Islam, una ang Eid’l Fitr, nga naghidumdom sa gibuhat ni Ibrahim nga āultimate sacrificeā og paghalad sa iyang anak tungod sa iyang bug-os nga paghigugma, pagsalig og pagtug-yan ngadto sa Ginoo.
Si Ibrahim, giila sa mga Kristyano nga si Abraham, ang giila sa mga Muslim nga may dakong papel sa kamugnaan sa Hajj kon pilrimage, gani natapos na kagahapong adlawa, adlaw nga Dominggo, ang sagradong pag-adto karong tuiga sa labing balaan nga lugar sa Mecca, Saudi Arabia.
Sa Sarangani Province, segun ni Ustadz Abdulbayan Laguialam sa Sulong Kapayapaan program ilalum sa opisina ni Governor Steve Chiongbian Solon, nahimong malinawon ang selebrasyon sa Eid’l Adha nga gisugdan kagahapon pang adlawa pinaagi sa mga pag-ampo/pag-sambayang, pagpinasay-luay sa mga kasal-anan, og ang pagpa-ambit sa mga karneng kanding og baka ngadto sa mga silingan og nanginahanglan.
Sa Sarangani, padayon lang usab ang Moro community sa pagtinabangay kauban ang lokal nga gobyerno aron magpabilin ang mga maayong pagtulun-an sa Islam hilabi na ngadto sa mga kabataan. Dakong papel niini ang Madrasah Arabic school.
Gani, sugod pa lang sa termino sa bag-ong napili nga mga opisyales sa probinsya human sa eleksyon, gipatigum dayon ni Governor Solon ang mga ustadz-magtutudlo sa Madrasah alang sa makanunayon nga pagbansay o capacity enhancement training-workshop aron munindot pa ang ilang pagtudlo sa mga kabataang Muslim katugbang ang DepEd Sarangani ALIVE program.
Aduna nay kwarentay-nuybe (49) kabuok Madrasah school sa Sarangani Province kung diin ang Provincial Government sa Sarangani ang gahatag og binulang honorarium sa mga Madaris facilitator, ga-ayuda pud ang mga municipal mayor.
Una nang nagpasalamat si Governor Solon, kauban sila Senador Manny og Congressman Ruel Pacquiao, Vice Governor Elmer De Peralta, mga board member og mga municipal-barangay officials, tungod kay nibisita ato lang Hulyo 28 ang grupo ni Doctor Abdullah Othman sa Madrasah Arabic school sa Baluntay, Alabel og sa Sapu Masla sa Malapatan, aron personal masaksihan ang mga best practices sa Muslim youth education nga gipatuman sa Sarangani og ang pwede nilang matabang gikan abroad.
Si Doctor Othman ang school director sa Al-Zuhri Institute of Higher Learning nga naka-basi sa nasud Singapore. First time nyang nakaadto sa Pilipinas. Iyang gidayig ang speech ni Governor Solon tungod kay kabalo mag-Arabic ang Gobernador bisan dili kini Muslim. Pamatuod lamang matud pa nga sinsiro kini sa iyang mga tumong sa Muslim community og walay diskriminasyon sa iyang pagdumala.
