Nailhan na sa mga otoridad ang mga rebeldeng New Peoples Army o NPA nga suspect sa pag-ataki sa mga security guards sa Minergy Coal fired power plant sa Balingasag, Misamis Oriental niadtong Lunes.
Mao kini ang gibutyag ni Police Major Cecilio Orculio, Hepe sa Balingasag Municipal Police Station.
Apan wala ibutyag ni Orculio, ang ngalan sa dili mominos 15 ka mga suspects nga maoy nag-ataki ug nag-imbargo sa mga armas sa lima ka mga sekyu sa Minergy.
Matud ni Orculio nga ila lang gihikay ang kaso nga ilang ipasaka batok sa mga suspects.
Gibutyag ni Orculio nga kasong robbery ang ilang ipasaka batok sa maong mga suspects ug kasong violation sa International Humanitarian law.
Ang maong mga sekyu, nag-guwardiya sa quarry site sa Minergy sa Barangay Quezon, lungsod sa Balingasag sa dihang gi-ataki kini sa mga rebelde mga alas 6:30 sa buntag niadtong Lunes.
Gipangtioan sa mga suspects ang lima ka mga sekyu ayha gikuha sa mga suspects ang ilang lima ka armas nga polos AK047 riffle.
Matud ni Orculio nga sigon sa ilang initial investigation nga ang armas ra gayud ang motibo ug tuyo sa mga suspects kay wala usab nila dagmali ang mga biktmang sekyu.
Hinoon matud ni Orculio nga bisan pa sa maong hitabo, wala kini makabalda sa operation sa Minergy nga planta sa kuryente sa lungsod sa Balingasag.
