General Santos City—Nahimong hapsay ug malinawon ang gihimong operation padlock sa kapulisan ug sa City permits and licensing office sa mga Small Town Lottery outlet sa pipila ka barangay sa syudad.
Sumala ni Police Chief Inspector Jovenson Bayona, hepe sa Police Station 1 nga wala may nahitabong kumusyon atol sa ilang operasyon sa ilang AOR hain 14 ka mga STL outlet ang una nilang napasara kagahapong adlawa.
Ilang gipasabot ug maayo ngadto sa mga nagbantay sa STL outlet ang bahin sa kamanduan ni Gensan City Mayor Ronnel Rivera ngadto sa STL operators nga temporaryo unang isara ang ilang mga outlet samtang wala pay pagtugot ang ilang operasyon ngadto sa syudad.
Gikumperma usab ni Police Chief Inspector Bayona nga atol sa ilang operasyon duna nay mga outlet nga buluntaryong gisara. Apan duna usay uban nga gihuwat pa ang ilang operasyon ayha gisunod ang mando sa mayor.
Samtang gipaniguro usab ni Bayona nga ilang imonitor ang tanang napasarad-ang STL outlet sa ilang AOR aron nga masigurong dili nila kini ablihan samtang wala pay concurrence gikan sa syudad.
