SAGAY CITY, NEGROS OCCIDENTAL – ( UPDATE ) May gina-uyatan na karon nga 14 ka mga witnesses ukon saksi ang pulis angut sa natabo nga mass killing sa Sagay City nga natabo sadtong Oktubre 20 sang gab-i.
Ini ang ginpahayag ni Sagay City Police Station chief of police, PCI Robert Mansueto sa interview sang DYHB.
Suno kay Mansueto nga gina-finalize na lamang nila ang resulta sang ila imbestigasyon matapos nakuhaan sang sworn statement ang 14 ka mga witnesses.
Pahayag niya nga ginatinguhaan nila nga matapos ang imbestigasyon agud nga mapasaka na ang kaso batuk sa mga suspek sa mas madali nga panahon.
Dugang pa ni Mansueto nga may identity na sila sang mga suspek kag nagapangita na lamang sila sang conclusive evidence batuk sa mga ini.
Siling sang hepe sang Sagay City Police Station nga ang statement sang mga saksi nagaangut ukon may connection sa mga ginasundan nga suspek.
Samtang, angut naman sa 13-anyos nga bata nga amo karon ang ginatumod principal witness sa natabo nga massacre, ginsiling ni Mansueto nga tuman ka crucial sang iya statement bangud sang iya description sang iya nasaksikan.
Ini kasunod nga nakita sang bata kon paano ginpangtiro ang mga biktima, ginsaysay kon paano siya nakapalagyo kag ang iya pagka-kilala sa mga suspek.
Angut sini, ginpasiguro ni Mansueto ang safety sang amo nga 13-anyos kon diin ginhatagan naman ini sang professional nga bulig agud mangin estable ang iya pamensaron halin sa iya traumatic experience sa natabo.
Nahibaluan nga kahapon, may nagpadulong sa DSWD kag nagpakilala nga lolo kag lola sang amo nga witness kon diin naga demanda ang mga ini nga i-release ang amo nga bata, apang sang ulihi napamatud-an nga wala gali sang labot ang mga ini sa amu nga witness./dyHB BACOLOD
