Padayon ang kabudlayan sang mga watchers/bantay sang mga pasyente sa Corazon Locsin Montelibano Memorial Regional Hospital (CLMMRH) nga ginadumilian na makasulod sa hospital.
Sa karun may kapin sa 104 ka mga watchers ang nagatiner sa canopy tents nga ginpatukod sang Brgy. 18 sa ciudad sang Bacolod sa pagpamuno ni Punong Barangay Madeline Diaz. Madumduman nga pila na ka bulan nga ginmando ni Dr. Julius Drilon, medical chief sang CLMMRH, ang pagdumili sa pagsulod sang mga watchers sa hospital bilang tikang agud matapna ang paglapta sang coronavirus.
Gani madamo sa mga ini ang naga-agwanta sang ulan kag init sa guwa sang hospital, sa kilid sang mga waiting shed kag mga botika samtang nagahulat update sa ila mga pasyente. Ini ang rason kun nga-a ang kapitan sang Brgy. 18 ang nagabulig sa mga watchers bisan pa ang kalabanan sa mga ini, indi taga-Bacolod.
Sa pagbisita sang RMN News Team, naga-reklamo ang mga watchers bangud nga sa security guard sila nagakuha sang update sa health status sang ila mga pasyente kag inoras pa makalab-ot sa pasyente ang ila ginapadala nga mga pagkaon. Hingyo kuntani sang mga watchers nga pahanugutan sila nga maka-bisita sa ila mga pasyente bisan sa makadali lang samtang ini ang confined, agud ila ini matatap.
Sa sitwasyon karun sang mga watchers sa Brgy. 18, indi man maobserbaran ang ginakampanya sang hospital nga physical distancing bangud nga naga-ginutok ang mga ini sa canopy tents. Handa naman nga magpa-swab test ang mga watchers kun himuon nga polisa sang hospital. Nahibaluan nga nahamtang sa CLMMRH ang Level 3 Biosafety Molecular Laboratory nga gingastuhan sang ciudad sang Bacolod sang P20 million.
[image: image.png]
