Nagka engkwentro kagahapong adlawa mga alas 8:20 sa buntag ang mga milatar ug New Peoples Army kon N-P-A sa Pinansian, Sosioan, Barangay Malinao, Gingoog City.
Matud ni Lt. Roel Maglalang, S7 Civil Military Operation Officer sa 23rd IB ubos sa 402nd brigade, 4th ID Philippine Army nga sa inisyal nga impormasyon nga naka engkwentro sa 23rd IB ang kapin kung kulang lima ka sakop sa CPP-NPA ug mokabat sa tulo ka minuto ilang panag bayloay og bala.
Dugang pa sa maong opisyal nga nadiskubrehan usab sa 23rd IB ang hide out sa N-P-A sa maong dapit sa Guirella Front (GF) TOTO, SRC1, North Central Mindanao Regional Command ubos ni alyas CEILO nga adunay kadak-on nga 60x100meters nga maka accomodate og 70 ka tawo.
Narecover usab nila sa maong hideout ang 20 ka makeshift beds, usa ka personal mine, lima ka clips sa grand ammunition, tulo ka backpacks nga dunay sulod nga nagkadaiyang tambal, medical supplies ug mga personal nga butang.
Apan atol sa maong engkwentro samdan sa walang bahin sa iyang mata ang usa ka private Kymer Villadarez ug wala na nasuta kung pila ang samdam o patay sa hanay sa N-P-A nga misibat sa maong engkwentro.
Sa karon, padayong nagpahigayon og mga operasyon ang tropa sa militar batok na sa mga N-P-A sa maong dapit.
