Naglaom si Misamis Oriental Governor Yevgeny Vincente Emano nga ang bag-ong Flood Control Project sa lungsod sa Tagoloan nga gi-inagurahan kagahapon, dili unta maoy katapusan apan maoy sinugdanan sa dagkong mga proyekto sa gobyerno nga ibubo sa iyang lungsod nga natawhan.
Kini gipadayag ni Governor Emano atol sa inauguration Ceremony sa 778 million pesos nga Flood Control Project sa Sitio Sihayon, Barangay Santa Cruz, Tagoloan, Misamis Oriental.
Matud ni Emano nga ang maong proyekto maoy maghatud sa dugang kalambuan tungod sa rason nga makalikay na ang katawhan sa maong lungsod sa hulga sa baha.
Gibutyag ni Emano nga wala nasayop ang DPWH nga nag-construct sa Flood Control Project kay kini nga suba lakip sa tinubdan sa panginabuhian sa katawhan sa ilang lungsod.
Gipanghinambog pa ni Emano nga ang Tagoloan River abonda sa labing mahal nga Isdang “Pigok” nga mokabat sa tag 800 pesos ang Kilo dinhi saMisamis Oriental apan 2,500 ang kilo kon madala na kini nga isda didto sa Metro Manila.
